نار هادئة حرامي الطماطم احمد مامون fish696@hotmail.com ارتفاع مخيف في اسعار الطماطم يكاد يفوق ارتفاع نسبة مياه النيل في الخريف .. سعر الكيلو يتراوح ما بين 25 جنيه 30 جنيه (وطبعا دي بدون ضريبة) اسعار الطماطم بقت تجيب (طمام).. نحنا مفروض نكون سلة غذاء العالم صرنا نشتهي الغذاء رخيا... الطماطم اختفت من المايدة والواحد لو شافها في السوق ساي (يغمي عليهو).. العزمك في بيتو وجاب ليك في الصينية (سلطة طماطم) اعرف انو بعزك جد جد.. كانت حل (للفلسة) لما ترجع من الشغل تغشي (الخرضجي) تشيل سلطة طماطم بتقضي يومك... هسي البندورة حترجعنا للعصر الحجري ونظام الشراء والبيع (بالمقايضة).. لو فلسته تبدل موبايلك بي (كيلو طماطم).. الطالب لو اكل (طماطماية ) تاني يوم بصبح بروفيسر ..من الفرحة طبعا.. والواحد لو جاب ليهو بت يسميها (بندورة) ولما يجي يناديها ..يدلعها يقول ليها : تعالي يا غالية.. وربة المنزل لو اتحصلت ع ربع كيلو طماطم (ممكن تتجدع) بدل ما تعمل سليقة ..تعمل (شية طماطم).. دلالة علي الترطيبة تعلق حبة (البندورة ) في باب البيت زي (رأس الخروف).. او تكون في مقدمة العربية محل (العطر).. ظاهرة (حرامي الطماطم ) حتتفشي من مبدأ سرقة ما خف وزنه وزاد سعره ...ولو (حرامي القلوب تلب ) اتاكد انو لو لقي التلاجة فاتحة ولم الطماطم بنسي قلبك وبظفر (بالغنيمة) شرااااااااااااااارة.. مافي حل غير(المقاطعة)
↧